حب لأخيك .................

سلام الله عليكم ..........................

انت بتنجح فى حياتك ؟

جربت أد ايه النجاح طعمه حلو ؟

بتبقى عامل ازاى وانت ناجح ومحقق شىء فى حياتك ؟

أكيد بتيقى طاير فى السما واحساسك بالسعادة لا يوصف ؟

طب ساعتها بتتمنى ان الناس كلها تعيش نفس التجربة وتحس نفس الاحساس ؟؟؟؟

سكت ليه ؟؟؟بتفكر فى ايه؟؟؟؟؟

جربت الفشل قبل كده ؟

حسيت أد ايه ان الفشل طعمه مر ؟؟

طب بتحس بايه لما بتفشل فى حاجة وما تحققش أى نجاح فيها ؟

أكيد بيبقى احساس صعب قوى وبتتمنى ساعتها ان الأرض تنشق وتبلعك

طب بتتمنى لغيرك انه ما يجربش الاحساس الصعب ده أو يمر بالتجربة المريرة ده ؟

سكت ليه ..بتفكر فى ايه .. هو السؤال صعب قوى كده ولا الاجابة مش مشجعة على الرد

أنا طبعا مش جاية اتكلم عن النجاح والفشل كاحساسين متناقضين بنمر بيهم من الوقت للتانى

ولكن اللى جاية اتكلم عنه هو

السؤال اللى انت قعدت تفكر فيه ؟؟؟

اللى لفت نظرى من بعض الناس اللى عرفتهم انه لما يمر بتجربة سيئة أو فشل فى أى حاجة

انه يتمنى ان غيره يتعرض لنفس الفشل

أو العكس

تلاقى بعض الناس الناجحة نفسها ما يبقاش حد ناجح تانى غيرها وان نجح ما يوصلش لدرجة نجاحه أو يتفوق عليه

دكتور ناجح مش عايز أى دكتور ناجح غيره

واحدة متجوزة وجوزها موريها المر وواحدة تيجى تكلمها ان حياتها زى الفل تتمنى فى معاميقها ان الست ده حياتها تبوظ وتعيش فى نفس المرار اللى هى عايشة فيه

طالب رسب فى الامتحانات يتمنى ان الطلبة كلها ترسب زيه

بنت لسه ما اتجوزتش وحسه أد ايه ان العنوسة شىء صعب قوى عليها

لما تسمع ان فلانة ربنا كرمها واتجوزت تلاقيها متغاظة على الاخر ونفسها الجوازة ده تبوظ

وغيرها من الأمثلة كتير

احنا فين من قول رسولنا محمد صى الله عليه وسلم

لا يؤمن أحدكم حتى يحب لأخيه ما يحب لنفسه

ايمانك رهن بحبك ما تحب لأخيك

انتى بتحب انك تنجح يبقى مش هتبقى مؤمن الا لما تحب انك تلاقى غيرك بينجح زيك

انت بتحب انك ما تفشلش يبقى مش هتبقى مؤمن الا لما تحب أن غيرك ما يفشلش

لو احنا طبقنا الحديث ده هتلاقينا بندفع بعض عشان ننجح كلنا

ولو حد فشل هيلاقى جنبه كتير يقفو جنبه ويساعدوه انه يعدى التجربة ده ويقف من جديد وينجح زيهم ومعاهم