مرحبا بالغائب الحبيب

سلام الله عليكم
باقى من الزمن 15يوم وو30دقيقة و5ثوانى؟؟؟؟
على ايه؟؟؟؟؟
فكروا شوية كده وقولولى.......
ايه؟الدراسة هتبدأ
طب افتكرولنا حاجة عدلة ربنا يكرمكم
ايه؟ هتتجوزى
ياااااه لسه بدرى.... يدينا ويديكم طولة العمر
امال ايه ؟؟؟؟؟
خلاص زهقتوا بسرعة كده ....هو النهاردة كام ؟
أغسطس 28
لالا بالهجرى لو سمحتم
مممممم .............15 شعبان؟؟؟؟
ايوة كده خلاص؟؟؟؟؟
قصد ك يعنى ان باقى15يوم و30دقيقة و5ثوانى ويخلص شعبان..وبعدين؟؟؟؟
وبعدين انتم؟؟؟؟؟
ااااااه قصدك يعنى ان باقى 15يوم و30دقيقة و5ثوانى وييجى رمضان
يااااااااااااااااااااااااه أخيرا.........ا
أيه يا جماعة هى ده حاجة بسيطة
رمضان على وصول والمفروض اننا نكون بنستعدله من زماان قوى هكذا كان الصحابة رضوان الله عليهم ينتظرون رمضان لرمضان ويرددون دائما اللهم بلغنا رمضان....... اللهم بلغنا رمضان...

فكيف حالنا نحن؟؟؟؟؟؟؟
أنا مشتاقة قوى لرمضان مشتاقة لاجتماع المسلمين كلهم على طاعة الله
مشتاقة للتجمع الاسرى على الافطار واللى ما بيحصلش دائما فى الأيام العادية
مشتاقة لصلاة التراويح وصلاة التهجد
مشتاقة لسماع القران فى الباصات اللى ما كانتش بتشغل غير أغانى
مشتاقة لرؤية وشوش الناس الصايمة واللى بتتغير كتير فى الصيام بحس ان الناس بتبقى هادية وعندها سكينة
مشتاقة للصيام نفسه فأنا بصراحة بحب الصيام قوى
مشتاقة لحرص الناس على الطاعات ومحاولتهم الدايمة البعد عن المعاصى بقدر الامكان
مشتاقة لرؤية الحجاب على البنات اللى ما بتلبسهوش فى الايام العادية وكأن لرمضان رب ولباقى الشهور رب اخر ؟؟؟؟؟؟؟
مشتاقة لعبارة اللهم انى امرؤ صائم؟؟؟؟

مشتاقة لرؤية الناس ماسكين المصاحف والتنافس الشديد على ختم القران أكثر من مرة

مشتاقة لرؤية شوارع بلدنا الحبيبة فااضية ومفيش زحمة ساعة الفطار

يااااااه لو السنة كلها تبقى رمضان

يارمضان مرحبا بك زائرا ....حبيبا...... غائبا هزنا الشوق اليه........ قادما ساقه الينا الحنين

يا رمضان انشر نورك فى الأرجاء..... بدد ظلمات الأهواء...... اقتل فينا بذر الشر....... اغرس فينا حب الخير....

اشف القلب من الأهواء
يا رمضان جفت ماقينا فأدركها وأرهقت كاهلنا الذنوب فخففها........ وتلاحقت على افئدتنا الشهوات فواسها.....

وتدنست الضمائر والنيات فطهرها وتعالت صيحات الاستغاثة فأسرع
فأسرع فنحن فى انتظارك

بقية الموضوع اللى فات

سلام الله عليكم
هتقولولى انت عملت ايه ؟
فى ايه ؟؟؟؟؟؟
هقولكم معذورين ؟ ما انتم ما قرأتوش البوست اللى فات ؟؟ يلا ما علينا عيب فى الاعلان عن المدونة معلش أدينا بنتعلم

خلينا فى المهم انا عملت ايه اللى عايزيعرف فى ايه يقرأالبوست اللى فات
فى رأيى ان الانسان ما بيقدرش يعيش فى منعزل عن الاخرين فما بالكم باخواته اكيد الواحد لازم يتأثر بكل من حوله وبيقولوا الزن على الودان أمر من السحر المهم انا قعدت فترة كبيرة متلخبطة مش عارفة مين الصح ومين الغلط مش عارفة امشى مع مين سلف ولا اخوان ولا أخلينا فى حالى < أصدقكم القول أنا حاولت أعمل كده كتير لكنى فشلت تماما اوكانت تنهار عزيمتى سريعا وأصل لحال مزرية حال غير مرضية تماما وصدق رسولنا الحبيب حين قال انما يأكل الذئب من الغنم لقاصية
فامنت اننى يجب ان أعمل مع جماعة وأخذت اقارن بين اخوتى واللذين يمثلان اأكبر جماعتين تعمل للاسلام الان ووجدت انه من الظلم ان احكم على فكر معين من خلال فردين فقط همابصراحة كويسين ولكنهم لا يمثلون بالنسبة لى صورة الانسان الملتزم اللى فى بالى
وبعد طول تفكير توصلت لهذا الأمر

أقر وأعترف ان المشكلة مش فى اخواتى

المشكلة فى انا؟؟؟؟؟

انا ايه اللى يخلينى سايبة نفسى للريح مترح ما تودينى تودينى ليه اسيب نفسى كلمة تودينى وكلمة تجيبنى
المهم فى يوم من الأيام وأنا قاعدة بحاول أحاسب نفسى قلت لنفسى مش كفاية توهة لحد كدة ولا ايه العمر بعزقة عمال بيفوت وانت لسه واقفة فى مكانك محلك سر ما بتعمليش حاجة غير انك تسمعى من الأخرين وتوجعى دماغك متقراى انت وتعرف وتتعرفى وتكتسبى العلم اللى يؤهلك للحكم على الأشياء توصلت لذلك متأخرا جدا
المهم بقى انى كنت مع الأخوات فى بلدنا ولكنى لم أكن مقتنعة تماما او بمعنى اصح ما كنتش فاهمة او ما كنتش بحاول أفهم ما علينا المهم كان المفروض انى اعمل مع أخوات الكلية ولكنى ترددت كثيرة حتى ان الأخوات خدونى دعوة فردية وأنا عملت عبيطة ومش فاهمة حاجة ما علينا برده
المهم فى نفس الوقت اللى وقفت فيه وقفة بجد مع نفسى قررت ان أعمل مع أخوات المدينة وبالفعل جلست جلسة وكان ده فى سنة تالتة المهم الاخت اللى كانت مسئولة عنى كانت زى العسل كنت أول مرة اشوف نموذج الأخت ده فى حياتى المهم كملت السنة مع الأخوات وجات سنة رابعة وعملت مع الأخوات من أول السنة وألتقيت بنماذج جميلة جدا من الأخوات اللتى التمست فيهم حبهم وتفانيهم فى دعوتهم

ووجدت العكس ايضا؟؟؟؟؟؟؟؟؟

المهم سنة رابعة كانت سنة سعيدة جدا لى بفضل الله ففيها ارتديت النقاب ولهذا الموضوع وقفة كبيرة بعدين مش وقته وحصلت على امتياز والأهم انى اتخطبت ولهذه وقفة أخرى برده
المهم أنا لقيت نفسى ماشية فى طريق القرب من الله والدعوة اليه فى طريق ....................
انا قلت لنفسى انت عايزة ايه؟؟ مش عايزة تفهمى دينك وتعملى به وتعملى له وهذا كله قد وجدت معظمه مع الأخوات يعنى ممكن تقولو عنى انىبقبيت مسلمة بتحاول تبقى ملتزمة وتعمل للاسلام من خلال ...........
أكيد انت عرفتم......؟؟؟؟
ماانتم عارفين اللى فيها

..........
يااه ه ه ه اكيد زهقتو لو ما كنتوش زهقتو أنا بقى زهقتلكم

أنا مش عارفه ايه اللى خلانى أتكلم فى الموضوع ده بس بصراحة انا استريحت كتيرلما اتكلمت..... اسفة على الاطالة

استودعكم الله الذى لا تضيع ودائعه
اللهم أرنا الحق حقا وارزقنا اتباعه وأرنا الباطل باطلا وارزقنا اجتنابه

أول مدونة

سلام الله عليكم

دى اول مدونة خاصة بيا بصراحة معرفتى بالمدونات جات متأخرة قوىىىىىىىى

تعرفت عليها عن طريق شخص ما والذى كان يسألنى عن المدونات ومدى معرفتى بها فقلت له مدونات ايه

وبعدها علطول دخلت على النت وعملت بحث وعرفت ايه حكاية المدونات دى

بصراحةفكرة المدونات دى عجبتنى قوى

حاجة جميلة ان الواحد يعبر عن اللى جواة ويلاقى ناس كتير بتشاركه

ناس بتقدمله نصايح بدون سابق معرفة

ناس بتشاركه همومه وأفراحه

ناس بتسمعه

بصراحة حاجة حلوة خالص
وبما انى بحب الحاجات الحلوة انا قررت ادخل عام المدونات الواسع وربنا يسهل ونكمل والله المستعان