سلام الله عليكم
فى البداية .....رجاء من كل الناس اللى هتشوف البوست ده تدعيلى جامد
أختكم داخلة على أيام عصيبة
أيام امتحانات يعنى والسنة دى شكلها جامدة حبتين
ربنا يعديها على خير
بجد محتاجة دعواتكم بشدة واعذرونى لو اتأخرت عليكم
وبما ان الأيام اللى أنا عايشة فيها اليومين دول فيها ورطات كتيرة والواحد مش عارف يلاقيها منين ولا منين
أنا ماشية فى حالى كده وبعدى على المدونات عادى ألاقى أخوكم دكتور حر وأختكم اخر العنقود
مدبسنى فى تاج من نوع جديد
تاج ورطة زى ما قالوا عليها
كل اللى شوفتهم ردو على التاج ده قالو عنه فى البداية انه ورطة
أنا طبعا مش هقول زيهم
لانى بعتبره مش بس ورطة...... ده ورطة جامدة على الاخر
مش كفاية الورطات الواحد فيها
الله المستعان
أولا:اذكر عشرة أشياء عن نفسك
ثانيا:اختر خمس أشخاص تهدى لهم التاج
ثالثا:لا تهدى التاج لمن أهداه إليك
رابعا:عرف اللي بعتلك التاج انك نزلته عندك
يعنى أنا المفروض أتكلم عن نفسى
طب هكلمكم عن مين
أصل أنا متعددة الأنفس ؟؟؟؟
يعنى ممكن تقولو كده حبة شخصيات مضروبين فى الخلاط وطلع منهم اللؤلؤة المكنونة
بس بصراحة أكتر نفس بحبها جواى هى اللؤلؤة المكنونة
أكيد هتقولولوا
انت عندك انفصام فى الشخصية
هو مش انفصام بالمعنى الحرفى للكمة بس ده اللى انا حساه جواى
ما عليكم
كأنى ما قلتش حاجة...........؟؟؟
أول حاجة ممكن أقولها عن نفسى وجات على بالى أول ما التاج جالى
أنا فتاة .... مسلمة..... وبحمد ربنا على النعمة الكبيرة ده وبدعيه انه يقوينى ويعينى على شكر هذه النعمة 1
يعنى بحاول على أد ما أقدر انى أبقى مسلمة بجد
فى ظاهرى .....فى باطنى ......فى عباداتى
فى تعاملاتى ..
.مع أهلى وأصحابى ...........مع أساتذتى
مع الناس فى الشارع ......مع المرضى فى المستشفى
فى كل شئون حياتى
..
بحاول...... ساعات أنجح وساعات المحاولة تبوء بالفشل الذريع
فلا أأيأس من رحمة ربى لعلمى أن ربى يغفر الذنوب ويقبل التوبة
ولا أنسىفى الوقت نفسه أن ربى شديد العقاب
2تانى حاجة أحب أقولها عن نفسى انى مخطوبة ولله الحمد
وبس
..............................................................................
3فلت من القصر بأعجوبة ربنا اللى بيحفظ وبيستر
قليلة حبتين ودايما أصحابى بيقولولى انت بتصغرى ولا بتكبرى
الكلية بقى واللى بتعمله فى الواحد
المهم انى مش مقتنعة بكلامهم ومقتنعة بنفسى جدا
الى أبعد الحدود
بتكلم بسرعة والناس هى اللى بتلفت نظرى لحاجة زى ده 4
5 بتصدم فى الناس كتير
العيب مش فى الناس العيب فى المثالية اللى بطلبهم وأحب الاقى الناس عليها
7بحب السجود قوى وياسلام لو دمعتين خشية ودعوتين من القلب
بقوم بعدهم واحدة تانية خالص
ادعولى لانى بقالى فترة محرومة من النعمة ده
8بحب الحب ...أحب أتحب..... وأحب أحب...... وأحب اشوف الناس بتحب بعضها
8عارفين اللى بيقولوا عليه اتقوا شره اذا غضب
أنا بقى هو الحليم ده
يعنى أنا بصبر وبستحمل كتير لكن بيجى وقت كده وأغضب وغضبى بيبقى شديد حبتين
بس فى الوقت نفسه بهدى بسرعة جدا
9فى عيب فى..... ما بعرفش أكمل حاجة للاخر
الموضوع ده حسيت بيه واتخذت خطوات جادة لتغييره وأوشكت على التخلص منه نهائيا
10أنا فرحانة انى وصلت للرقم عشرة
لانى بكده كملت للاخر ..
وهم انزاح من على
هو ايه الشىء العاشر ؟؟
أنا جاية فى الكلام أهو
هى حاجة مش موجودة دلوقتى يعنى اتمنى انها تحصل مستقبلا ان شاء الله واجى أقولكم عن نفسى انى
زوجة صالحة
أم حنونة
دكتورة شطورة
ان شاء الله
بمرر التاج ل
مدونات زوجة عاشقة
وخلص الكلام
عاشقة الفردوس
ammola
nonoymm
ادعولى جامد
23 comments:
مش متاكدة اذا كنت اول تعليق والا لا..بس يالا
اجابات جميلة زي بقيت العيلة.. وربنا يعينك يارب ويسهل لك الامتحانات
وتحققي كل امنياتك ومتتصدميش في حد تاني.. وفعلا بتتكلمي بسرعة بس مش قوي يعني
ودعواتك لينا عشان احنا كمان عندنا امتحانات
ههههههههههههههههههههههه
تصدقي كنت حاسه اني بقرا كلامك ومش ملاحقاه
زي مايكون بتجري وانتي بتقوليه
بس عسوله يالؤلؤه
ربنا يباركلك وتبقي زوجه صالحه وام حنون ودكتوره شطوره علشان تعالجينا بقي
وياريت تبقي جراحه ياسلام تبقي عسوله اوي
اصل يااختي دي ازمه
سلام يالؤلؤتي
وشكرا ياستي ع التدبيسه يالهوتي
حتي انتي يالؤلؤتي تدبسيني كده
ماشي ياقمرايه هعديها بس مش هنسهالك
هههههههههههه
سلام
ربنا يبارك فيكي انت عسولة وربنا يحفظك
البنوتات الحلوين مرروا لي التاج الورطة دة دكتورة اجدع ولؤلؤتي
مااااااشي ورطة مقبولة
احبكم في الله
ربنا ينجحك يارب
وفقكم الله
تحياتي
الواحد نفسه اتقطع وهو بيقرأ
الواحد كان بيجري وراء الكلام علشان يلحقه
هي السرعة واضحة
انما ممكن ده يكون عيب وممكن ميزه
المهم النص التاني شايفه ازاي ..ميزه ولا لا
طبعا هيخاف يجاوب
هههههه
سعداء بهذا الوست الذي اتاح لنا فرصة التعرف على شخصيتكم الكريمة
وربنا يوفقك ان شاء الله في دراستك وحياتك
وتبقى زوجة شطورة
ودكتوره صااااااالحة
لان الزوجة الشطوره اكيد هي الصالحة
لكن الدكتورة الشطورة مش شرط تكون صالحة
ممكن تكون حرامية كمان
شاطره تاخد الفلوس من جيب الناس
ربنا يوفقك يا فندم
ربنا يوفقك فى الامتحانات ان شاء الله
بجد اجابات كلها متوقعة ما عدا
اتقوا شر الحليم .....دى
تصدقى مش باين عليكى خالص
بس يلا كويس ان انتى قلتى عشان نبقى ناخد بالنا بعدين هههههههههههههههههههه
طبعا" بهزر
انتى عسولة يا مى
ربنا يوفقك وييحقق لك كل اللى تتمنيه
اسماء ابوزيد
كل ده عرفته من عشر حاجات بس
يلا
كلها اسبوع وابعت لك التاج تاني
:))
وربنا يزيد من حرصك
ونقاء سريرتك
ويزيدك يا رب
وموضوع الصدمة في الناس ده
احب ابشرك
انتي لسه في اوله بس
ربنا يثبتنا ويحفظنا
وجزيتي خيرا على تلبية التاج
سميةأبو زيد
أم عمار سابقا
ليكى وحشة ..المدونة كلها مش هتقضيها
خلى عندك ثقة بنفسك أكتر من كده
أول تعليق يعنى أول تعليق
ومتشكرين يا ستى على الدعوات ده ربنا يكرمك يا رب
عاشقة الفردوس
يعنى أنا مش بكلم بسرعة بس وكمان
بكتب بسرعة
يلا بقى ربنا يعافينى ...
أما بقى بالنسبة لدكتورة الجراحة ما وعدكيشى غالبا أختك كده ناوية على أطفال ان شاء الله ربنا يعين
كان نفسى أخدمك والله
ربنا يبعد عنك كل شر ومرض وما يحوجكيش لدكتور أبدا
لا شكر على تاج يا قمر
nonoymm
ربنا يخليكى يا رب
والله كل ما ادخل المدونة ولاقيكى سايبة تعليق بفرح خالص
تعليقك يدخل السرور على قلبى
ربنا يباركلك
تاج ورطة ايه احنا مش بتوع الكلام ده أدها وادود ان شاء الله
رئيسة حزب الأحلام
جزاكم الله خيرا على المرور وعلى الدعاء
أرجو تكرار الزيارة
أحمد سعيد بسيونى
ووفقك أخى
الباحث عن الحقيقة
بتجرى ونفسك اتقطع؟
هى المدونة مش فى طريق الاستراحة ولا ايه
كنت ريح فيها شوية ...
بدل البهدلة ده كلها ...
أتفق معاك فى حكاية زوجة شطورة
وقمة الشطارة انها تبقى صالحة
أما بالنسبة لدكتورة صالحة
أنا فلى رأيى انها لازم تجمع بين الاتنين
شاطرة عارفة شعلها كويس لان الحكاية حياة مرضى مش لعب
وكمان لازم يبقى عندها رأفة ورحمة أسأل الله أن أكون منهم
جزاكم الله خيرا على المتابعة
أسماء أبو زيد
انتى اللى عسل والله يا أ.أسماء
ربنا يكرمك على المتابعة الجيدة وعلى الدعاء
دكتور حر
حرص ونقاء سريرة ...ده مين اللى كده ؟؟ربنا يستر
شكلك كده هتصدم أنا مش مسئولة
عرفت عشر حاجات ؟؟
تصدق... انا نسيت انك بتدخل المدونة
كان المفروض اخد بالى
:))
يلا بقى ملحوقة ....لا تاجات بعد الان
عرفت عشر حاجات ....
احمد ربنا على الاخر
جزاكم الله خيرا على المتابعة وعلى التعليق
ياااه والله فرحت ،الهدايا ليها وقعها برده مهما كانت ،وحشتينى أوىىىىىىىىىي يا أحلي لؤلؤة،ربنا يوفقك في الأمتحانات وتبقى دكتورة ممتازة بس يارب تبقى نسا وتوليد،وربنا مايحرمكيش من نعمة البكاء بين يديه وإياي0
ربنا يوفقك
استعيني بالله ولا تعجزى
انتي جميلة قوي يا بنوته
ربنا يزيدك يارب ويثبتك
ويوفقك في امتحاناتك
يااااااااااااااااااااارب
ايه بس الاجابات الجامدة دى كلها
ربنا يسعدك وان شاء الله التاج الجاى تكون الاجابة متزوجة ودكتورة قد الدنيا
اشكرك اوى على الاهداء بس ادينى شوية وقت كده
اولا سعيده جدا بدخولي مدونتك
ثانيا ربنا يوفقك في الامتحانات ويسهل عليك كل صعب
ثالثا نفسي ابقى زيك كده ويكون الله هو غايتي
بس الدنيا ونفسي الوحشة
ادعيلي
ياريت تزورريني دلوقتي بسرعة أول ماتفضي من المذاكرة ،هاتلاقي حاجة يعني مش عارفة،هاتعتبري التاج كدة وصل والا لأ،أوعي تزعلي مني ، ربنا يكرمك يارب ويوفقك في إمتحاناتك0
ن
الزواج روضة حب
لماضة
أمولة
بنت أبيها
حل وسط
جزاكم الله خيرا
معلش مشغولة
ادعولى جامد
يااااه بجد شكرا يا لؤلؤة على التاج
بجد مش عارفة اقول ايه
ربنا يكرمك على تمريرك التاج ليا
ربنايكرمك اجاباتك فل وتمام ماشاء الله عليكى
:))
ربنا معاكى في الامتحانات وتعدي الفترة دى على خير
انا اسفة على الانقطاع برده بسبب الامتحانات
بحبك في الله
:)
Post a Comment