سلام الله عليكم
تانى مرة يجيلى تاج
وبرده من نفس الشخص
بلديات بقى يا جماعة
ومنافية زى بعضينا
نتوكل على الله وباسمه نبدا
لو ماكنتش مصرى بس عربى كانت هتبقى ايه نظرتك للمصريين واللى بيحصل فى مصر دلوقتى؟
بصراحة عمرى ما تخيلت نفسى اكون غير انا
بس هو فيه فرق بين المصرى والعربى ما احنا كلنا عرب برده؟؟
عموما نظرتى مش هتختلف
هبقى زعلانة قوى على حال المصريين اللى حالهم بيفكرنى بالمريض اللى عارف مرضه كويس وفى نفس الوقت عارف علاجه لكنه بيعافر او بيستهبل او بيسيعبط او مش فارقة معاه أو مش معاه فلوس يجيب العلاج ده بقى حال الشعب أو المحكومين
أما الحكام فحدث ولا حرج شكلهم كده فى غيبوبة ومش حسين بأى حاجة فى حالة الا وعى كما يقولون
ربنا يفوق من فى الغيبوبة ويشفى من لا يجد قوته
بصراحة حال يكئب
لو كنت اوروبى غير مسلم بردو ايه نظرتك للعرب والمسلمين؟
أولا سأرفض التعميم او الحكم على الاشياء بدون دراسة واقرا فى الدين الاسلامى وبعدين احكم
هاكيد هاقول مين اللى قال ان هو ده الاسلام اللى بيكلموا عنه
وافصل بين الدين وبين المنتسبين للدين اسما وليس فعلا
واعلن اسلامى فورا
لو قالو انك بقيت رئيس جمهورية؟
هاقولوهم أكيد اشاعة وهتحقق من الامر
ولو طلع الخبر صحيح هاقولهم اخترتم الشخص غير المناسب للمكان غير المناسب برده
رئاسة جمهورية ايه هو الواحدعارف يبقى رئيس جمهورية نفسه علشان يبقى رئيس جمهورية بلد
الله المستعان
وقبل ده كله تولى المرأة هذا المنصب حرام شرعا
هى الحكاية ناقصة خيبة ما كفاية اللى احنا فيه
عموما أنا برشح عصفور المدينة
لو كان ينفع ترجع طفل تانى وتخليك طفل على طول هترجع وليه؟
زمان وانا صغير كنت بحلم ابقى كبير..... ابقى كبير .......كبر القلب واتحير من الدنيا ومن المشاوير
بصراحة كده كل مرحلة لها جمالها ولها عيوبها ولها مميزاتها
ما دام ربنا كتبلى انى أكبر اكيد ان ده أفضل
وما يقدره ربى ترضى به نفسى
لوعندك مريض وحالته ميؤس منهاايهما تفضل انك تصارحه بالأمر وتقوله كل شىء بأمر الله فى الاخر ولا تغرس فيه الامل لغاية ما يموت؟
اولا مفيش حاجة ميؤس منها كل شىء بيد الله وربنا قادر على كل شىء وربك لا يعجزه شىء
اعتقد لو الحقيقة دى استقرت فى نفس أى مريض أكيد هيتلقى أى شىء بالرضا
لكن انا مش اقدر اواجه المريض بالخبر شخصيا ممكن أبلغ أهله وهم يتصرفوا
انا ضعيفة جدا فى المواقف دى
لو سمح لك برؤية الرسول عليه الصلاة والسلام وانك تقوله كلمة واحدة او جماة واحدة هتكون ايه ؟
يااااه الواحد يستاهل كده؟؟؟
دا لو حصل الواحد مش هيعوز حاجة من الدنيا تانى
هقوله
انت راضى عنى؟
لو خطبت واحدة أو اتخطبت لواحد واكتشفت ان الطرف الاخر غير قادر على الانجاب ؟
عايزين الصراحة الموضوع ده صعب قوى على الطرفين وبما انكم بتسألونى أنا
هاحط نفسى مكان الطرف الاخر واشوف ما كنت اتمنى الطرف التانى يعمله وهاعمله
بس ساعات العواطف وحدها لا تكفى
لكن برده اتخيل نفسى انا اللى غير قادرة على الانجاب ساعتها هبيبقى نفسى الطرف الاخر يكمل الموضوع بس بصراحة هاسمحله يجوز زوجة تانية ويبقى عنده أولاد
بس يا ترى هو هيكون موقفه ايه؟
لو طلعت القمر هتكتب ايه عليه ؟
نفس اجابة عصفور المدينة ودكتور حر
لو كنت فى عصر ازدهار الاندلس كنت تتخيل نفسك ؟
وماله العصر اللى احنا عايشين فيه ما كله ازدهار وتنمية وبلدنا بتتقدم بينا
يعنى الواحد يبقى عنده ازدهار ويروح يدور فى حتة تانية ؟
ده حتى ازدهار تزعل منى على فكرة ازدهار ده اسم صاحبتى
عموما ما أتخيله مجرد اختلافات ظاهرية الاسم مختلف ......اللبس مختلف ......طريقة الحياة مختلفة
بس أكيد هبقى أنا برده فى طريقة تفكيرى وفى قناعاتى
بس ممكن نقول لو انا عايزة حاجة تتغير
انى أكون مدرسة بضم الميم وبفتحها ولا أكثر من ذلك
لو انا مررت التاج ده لحد وما جاوبش عليه هاعمل فيه ايه؟
كل واحد حر فى تصرفاته
بس شكلك كده مش ناوى على خير
الحمد لله أنا خدت بالأسباب واجبت على التاج
احنا مش قدزعلك
21 comments:
m
جزاكم الله خيرا على الردود الجميله
والتلبيه السريعه للتاج
وكده ترشحي عصفور المدينه قصادي
دي آخرتها
تشيليني من الراجل
ماشي
عموما انا كنت هرشحه فترتين لحد ال 40
لا وكمان ناوي على خيييييييييييييير
جامد قوي
تحياتي ودمت بخي
إن شاء الله يمن عليك برؤية نبيه صلى الله عليه وسلم في الدنيا والآخرة
وشكرا لكم على الترشيح انتم شكلكم ناوين لي على حاجة
:)
وبعدين أقترح أن الرئيس يكون من المنوفية أحسن
:)
أختي الفاضلة ....ردودك علي التاج رائعة ..تحياتي
ايه ياعسل الردود الجميلة دى........
بجد لذيذة قوى...دمك خفيف فيها قوى يادكتورة
***
ربنا يكرمك يارب ويسعدك دايما
**
اسأل الله لك صلاحا فى الحال والمآل
**
دعواتك
ماشاء الله إجابات رائعة
وبإذن الله ربنا هيخليك تشوفي النبي
........
دمتم
السلام عليكم الاجابات ممتازه ربنا يجزي حضرتيك خير
دكتور حر
جزاكم الله خيرا على المرور
انت فين والاربعين فين
وعموما ممكن تطعن فى نزاهة الانتخابات وساعتها بقى هرشح..............
برده عصفور المدينة
الاستاذ عصفور المدينة
جزاكم الله خيرا على المرور
لا شكر على واجب
وكمان حضرتك ادها وادود
منافية تانى ما احنا جربناهم تلات مرات عايزين تجديد بقى
هيثم أبو خليل
عبدالرحمن ياسين
جزاكم الله خيرا على المرور وعلى هذا الاطراء
دمتم بخير
حبيبتى أمانى
جزاكم الله خيرا على المرور
وعلى الدعاء ربنا يستجيبلك
وخفة دم ايه يمكن أكون اتعديت ؟؟؟؟؟؟
الفاتح الجعفرى
وعليكم السلام ورحمة الله وبركاته
جزيتم خيرا على المرور لاول مرة
ونرجو المداومة
ياسلام ياسلام ....اتعديتى ...لا ولسسسسسسسسه يادكتورة...ببشرك يعنى
ربنا يكرمك يالؤلؤة ياااااااارب
انا كنت داخل اعلق
وجدت اسمى فى اول تعليق وهنا كنت سيبه فاضلى ولا ايه
ع العموم ردودك طيبه
بس فى حكم فقهى انتى اصدرتيه
وهو
وقبل ده كله تولى المرأة هذا المنصب حرام شرعا
الأمر فيه اختلاف كثير
وانتى اختصرتى الموضوع فى كلمه
لا اقول الا
حفظكِ الله
النجمة الصامدة
اختى جزاكم الله خيرا على المرور وعلى المتابعة
انا عارفة انى مقصرة فى حقك رغم انى متابعة تدويناتك لكنى ما بعلقش
عموما ملحوقة
تقبلى خالص تحياتىوحبى
اجابات جميله حقيقي واحسن اجابه عجبتني موضوع المريض والثقه في ان الله بيده كل شيء ولا يعجزه شيء
اتمنى ان نرى عصفور المدينه في سدة الحكم قريبا
تحياتي و اتمنى ان نتواصل وتزوري مدونتي المتواضعه
الشاعر بن هلال
جزاك الله خيرا .ردود بسيطة ومميزة بحق.
ولكن من غير زعل كده.ردك على سؤال لو ترجع طفل تانى فى بدايته أظنه أنه جزء من أغنيه وأنا عارفة انك ما تقصديش لأن أنا عارفة انك مابتسمعيش أغانى فكان ليس من الضرورى ذكرها
أحبك فى الله
شمس الغد
ا
الشاعر بن هلال
جزيتم كل الخير على المرور وعلى التعليق
وعلى وعد بزيارة مدونة حضرتك
أرجو دوام التواصل
شمس الغد
حبيبتى الغالية
جزاكم الله خيرا على المرور وعلى التعليق واما بقى حكاية اجابتى على سؤال لو عايز ترجع طفلى وانه كلام أغنية انا معاكىولكن ليس معنى ذلك اننى باسمع أغانى
ده أغنية كنت سمعتها وانا ضغيرة والجزء ده بس هو اللى علق معاى ولما قرأت السؤال ده جت على بالى وكتبتهاليس أكثر من ذلك
ما كنش لازم تقولى من غير زعل ده
انت عارفانى انا مابزعلش بالذات من الناس اللى بيحبونى وانا عارفة انك قلت كده من حبك لى
احبك الذى أحببتنى فيه
وارجو دوام التواصل
اية الحلاوة دى
ابشر
Post a Comment